पुणेकरांवर अघोषित पाणीकपात; गुरुवारी संपूर्ण शहराचा पाणीपुरवठा बंद राहणार

महाराष्ट्रातील सर्व अपडेट्ससाठी आमचं व्हॉट्सअ‍ॅप चॅनल जॉईन करा

पुणे (प्रतिनिधी): पर्वती जलशुद्धीकरण केंद्र आणि त्याअंतर्गत विविध जलकेंद्र व टाक्यांची तातडीची देखभाल दुरुस्ती केली जाणार आहे. त्यामुळे येत्या गुरुवारी (२१ डिसेंबर) रोजी संपूर्ण शहराचा पाणीपुरवठा बंद राहणार आहे. तर शुक्रवारी सकाळी उशिरा व कमी दाबाने पाणीपुरवठा होणार आहे.

पर्वती एमएलआर, पर्वती एचएलआर, पर्वती एलएलआर टाक्या, लष्कर जलकेंद्र, वडगाव जलकेंद्र, नवे व जुने होळकर जलकेंद्र, वारजे जलकेंद्र, चांदणी चौक टाकी परिसर, गांधी भवन टाकी परिसर, पॅनकार्ड क्लब जीएसआर टाकी, वारजे जलकेंद्र जीएसआर टाकी, एसएनडीटी एमएलआर व एचएलआर परिसर, चतुशृंगी टाकी व त्यावर अवलंबून परिसरातील पाणीपुरवठा गुरुवारी बंद राहणार आहे. त्यामुळे शुक्रवारी २२ डिसेंबर रोजी सकाळी उशिरा व कमी दाबाने पाणीपुरवठा होईल, अशी माहिती पाणीपुरवठा विभागाचे अधीक्षक अभियंता प्रसन्नराघव जोशी यांनी दिली.

पुण्यात यंदा कमी पाऊस झाल्याने पुणे शहराला पाणीपुरवठा करणारी धरणे १०० टक्के भरू शकली नाहीत. त्यामुळे उपलब्ध पाणीसाठ्याचे काटेकोर नियोजन व वापर करावा लागणार आहे. या पार्श्वभूमीवर पाणी जपून वापरा अन्यथा जानेवारीपासून पाणीकपात करण्याचा इशारा जलसंपदा विभागाने महापालिकेला नुकताच दिला होता.

यानंतर महापालिकेने देखभाल दुरुस्तीच्या अडून ही अघोषित पाणीकपात लादल्याची चर्चा आता सुरू झाली आहे. चालू वर्षात पावसाळ्याच्या दोन महिन्यात अतिशय कमी पाऊस झाल्याने महापालिकेने दर गुरुवारी पाणीपुरवठा बंद ठेवला होता. महिन्यातील चारही गुरुवार संपूर्ण शहराचा पाणईपुरवठा बंद ठेवल्यास ०.२५ टीएमसी पाण्याची बचत होते, असा दावा महापालिकेच्या पाणीपुरवठा विभागाने केला होता. त्याच धर्तीवर जलसंपदा विभागाच्या सूचनेनुसार महापालिकेने ही अघोषित पाणीकपात लागू केल्याची चर्चा शहरात सुरू झाली आहे.