भारताविरुद्धच्या पहिल्या कसोटीसाठी वेस्ट इंडिजचा संघ जाहीर, पाहा कोणाला मिळाली संधी

भारत आणि वेस्ट इंडिज यांच्यातील कसोटी सामन्याने या दौऱ्याला सुरुवात होणार आहे. भारताविरुद्धच्या पहिल्या कसोटी सामन्यासाठी आता वेस्ट इंडिजचा संघ जाहीर करण्यात आला आहे. भारत आणि वेस्ट इंडिज यांच्यातील पहिला कसोटी सामना हा १२ जुलैला सुरु होणार आहे. या दौऱ्यात भारतीय संघ वेस्ट इंडिजबरोबर दोन कसोटी, तीन वनडे आणि पाचच टी-२० सामन्यांची मालिका खेळणार आहे.

डावखुरा किम मॅकेन्झी आणि अॅलिक अॅथनेझ यांची भारताविरुद्धच्या मालिकेतील पहिल्या कसोटीसाठी निवड झाली आहे. या संघात अष्टपैलू राहकीम कॉर्नवॉल याने पुनरागमन केले आहे. या कसोटीसाठी १३ जणांची निवड करताना दोन राखीव खेळाडूही निवडले आहेत. मॅकेन्झी आणि अॅथनेझ यांना आंतरराष्ट्रीय वन-डे सामन्यांचा अनुभव आहे. या दोघांनी बांगलादेश दौऱ्यात ‘अ’ संघातून खेळताना चांगली खेळी केली होती. त्यांना संधी देण्याची ही योग्य वेळ आहे, असे निवड समितीचे अध्यक्ष डेसमंड हेन्स यांनी सांगितले. कॉर्नवेल अखेरची कसोटी २०२१ च्या नोव्हेंबरमध्ये खेळला होता. डावखुरा फिरकी गोलंदाज जोम वॉरिकन याने संघात पुनरागमन केले आहे. गुदाकेश मॉटी हा तंदुरुस्त नसल्यामुळे त्याला वगळण्यात आले आहे.

यापूर्वी वेस्ट इंडिजच्या संघाला मोठा धक्का हा विश्वचषकाच्या पात्रता फेरीत बसला होता. कारण वेस्ट इंडिजला या स्पर्धेत स्कॉटलंडसारख्या कमी अनुभव असलेल्या संघाने पराभूत केले आणि ते विश्वचषकातून बाहेर पडले होते. आतापर्यंतच्या क्रिकेट इतिहासामध्ये ही गोष्ट पहिल्यांदाच घडली होती. कारण यापूर्वी कधीही वेस्ट इंडिजच्या संघावर कधीही विश्वचषकातून बाहेर पडण्याची नामुष्की ओढवली नव्हती. पण यावेळी मात्र पहिल्यांदाच त्यांना वनडे वर्ल्ड कपमध्ये खेळता येणार नाही.

विंडीज संघ ः क्रेग ब्रेथवेट (कर्णधार), जेर्मेन ब्लॅकवूड (उपकर्णधार), अॅलिक अॅथनेझ, तागेनारायण चंदरपॉल, राहकीम कॉर्नवॉल, जोशुआ डिसिल्वा, शॅनन गॅब्रिएल, जेसन होल्डर, अल्झारी जोसेफ, किर्क मॅकेन्झी, रेमन रायफर, केमार रोच, जोमेल वॉरिकन. राखीव : तेविन इमलाच, अकीम जॉर्डन.

×
Get Upto 5 Lac Credit Limit
×
Breaking News